پروٹوکول یا لاپرواہی؟ ملزمہ پنکی کی بغیر ہتھکڑی عدالت میں پیشی، کراچی پولیس چیف کا سخت نوٹس۔
کراچی: شہر قائد میں منشیات فروشی کے نیٹ ورک میں ملوث ایک اہم ملزمہ، انمول عرف پنکی کی گرفتاری کے بعد اس کی ایک مبینہ آڈیو ریکارڈنگ منظرِ عام پر آئی ہے جس نے پولیس کے تفتیشی نظام پر کئی سوالات کھڑے کر دیے ہیں۔
آڈیو میں حیران کن انکشافات:
لیک ہونے والی آڈیو میں ملزمہ انمول کو انتہائی مغرورانہ لہجے میں پولیس اہلکاروں کا مذاق اڑاتے ہوئے سنا جا سکتا ہے۔ ملزمہ کا کہنا ہے کہ "آپ لوگوں کی عقل گھٹنوں میں ہے، 8 سے 9 سال میرے پیچھے لگے رہتے ہیں، ریٹائر ہو جاتے ہیں مگر مجھے پکڑ نہیں پاتے۔" اس نے مزید کہا کہ وہ پورے کراچی میں اپنا نیٹ ورک چلا رہی ہے، اگر کسی میں ہمت ہے تو اسے روک کر دکھائے۔
عدالتی کارروائی اور پولیس کا رویہ:
ملزمہ کو گزشتہ روز کراچی کی مقامی عدالت میں منشیات برآمدگی اور غیر قانونی اسلحہ رکھنے کے کیس میں پیش کیا گیا۔ تاہم، عوامی اور سوشل میڈیا پر اس وقت شدید ردعمل دیکھنے میں آیا جب ملزمہ کو کسی مجرم کے بجائے ایک عام شہری کی طرح بغیر ہتھکڑی کے عدالت لایا گیا۔
پولیس چیف کا ایکشن:
کراچی پولیس چیف، آزاد خان نے واقعے کا سخت نوٹس لیتے ہوئے ملزمہ کو بغیر ہتھکڑی عدالت پیش کرنے پر برہمی کا اظہار کیا ہے۔ انہوں نے اس معاملے کی شفاف تحقیقات کے لیے ایک اعلیٰ سطح کی کمیٹی قائم کر دی ہے اور متعلقہ اہلکاروں کو گارڈن ہیڈ کوارٹر رپورٹ کرنے کا حکم دیا ہے۔ ملزمہ کو فی الحال عدالتی ریمانڈ پر جیل بھیج دیا گیا ہے۔
